A hwy a ffromasant
(Ar ôl clywed y Parchedig Rees
T. Williams, Llwyngwril,
yn pregethu ar y testun: "...a hi a dorrodd y blwch...")
Mair o Fethania
a'th ennaint drud -
ai hyn dy gyfraniad
i dlodi'r byd?
Fe dorraist y blwch
- nid digon ei agor -
a thywallt y nard
heb feddwl rhagor
am gost y weithred:
ni holaist faint,
na gwrando ar och
y darbodus saint.
Distrywiaist y costus,
oferaist y drud:
ai hyn dy gyfraniad
i dlodi'r byd?
Ie - torraist y blwch:
difethaist y drudfawr -
y fandal hir walltog
a'th ddifrod anwar!