Rho arwydd
Rho arwydd inni, Arglwydd -
bellach,
dim ond darn hiraethus a diffrwyth
o lwyfan 'steddfod ein hoes
yw erwau'r Ardd:
darn i'w droedio'n ddagreuol ar ddydd alltud
cyn dychwelyd yn llawn gwenau
i gynefin ein haelwydydd-ar-wasgar, clyd.
A blas yr afal -
bellach,
nid yw'n ddim ond dincod ar ein dannedd,
a'r cof brith o'i chwerwder-melys
yn ddim ond esgus parod i lyncu'r ffisig
mêl.
Pa ryfedd nad y'm yn ddeiliaid?
Pa ryfedd nad oes ynom ddeall?
Dwed wrthym eto, Arglwydd -
pa beth sy'n dda
a pha beth sy'n ddrwg?
Rho arwydd i ni, Arglwydd -
bellach,
nid yw'r golofn dân
yn ddigon gwynias
yn erbyn cefnlen lachar ein cyfnos,
na'r cwmwl mwg yn ddigon du
yn nuwch ein dyddiau.
Pa ryfedd mai cam yw
ein cerdded?
Pa ryfedd nad oes i ni orwelion?
Dangos i ni eto, Arglwydd -
ogoniant y wawr
a duwch y nos.
Arglwydd -
rho eto arwydd:
nid yw'n rhwydd
i ni dderbyn y lleill.
Y Faner, 16-04-1970